杭铃杭铃马来哉，隔壁大姐转来哉，买个啥格菜，茭白炒虾，田鸡踏杀老乌，老乌告状，告拨和尚，和尚念经，念拨观音，观音烧香，烧拨乌龟，乌龟拆屁，拆到囡囡嘴巴里。
今朝礼拜三，我去卖洋伞。掉脱三角三，转来做瘪三。打只电话三零三，寻个医生猪头三，吓得逃到天平山，跌得屁股粉粉碎。今早礼拜三，上海下来个小瘪三，着个白缎衫，拿个黑阳伞，走到半路途上肚皮痛得不来三，请个医生猪头三，配个药嘛陆陆三，铜钿用脱三分三厘三。
笃笃笃，买糖粥，三斤胡桃四斤壳，吃仔倷个肉，还仔倷个壳。
大清老早，掼只书包。分量蛮重，作业要交。昨日夜里，老早困觉。节目再好，遥控器上交。为啥大人，比伲逍遥。等我长大，抱牢俚困觉。七点钟出门，伲最勤劳。公交车浪，牛奶面包。学堂升旗，大家立好。b、p、m、f，随要记牢。三三得八，究竟多少？回答勿出，有点烦恼。
摇啊摇，摇到外婆桥，外婆叫我好宝宝，买条鱼烧烧，头勿熟，尾巴焦，摆勒碗里必剥跳，外孙看得哈哈笑。
阿哟哇，啥么事？蚊子叮，爬上来。呒不梯，借拨倷。谢谢倷，勿要紧。
苏州玄妙观，东西两判官，东判官姓潘，西判官姓管；东判官手里拿块豆腐干，西判官手里拿块老卜干；东判官要吃西判官手里的老卜干，西判官要吃东判官手里的豆腐干；东判官勿肯拨西判官吃豆腐干，西判官勿肯拨东判官吃老卜干。
一根葱，两头通，通来通去都是洞。姆妈勒朗街浪去，买只小马桶。开开来，十七八只小老虫。
麻麻驮，喫果果。爹爹转来割耳朵。称称看，贰斤半；烧烧看，三大碗。爷一碗来娘一碗，门阁落里斋罗汉。罗汉勿喫荤，豆腐面筋囫囵吞。
匍下来，立起来，淘淘米，烧烧饭。倷吃几碗饭？吾吃两碗饭；倷吃几棵菜？吾吃两棵菜。电灯挂起来，票子挖出来，清零框浪算算看：冬菜冬菜大头菜，香萝卜干咸橄榄。
一只老虎一只猫，一个跟仔一个跳，跳过是只大老虎，跌倒是只煨灶猫。
姑苏小吃名堂多，味道香甜软酥糯。生煎馒头蟹壳黄，老虎脚爪绞连棒。千层饼、蛋石衣，大饼油条豆腐桨。葱油花卷葱油饼，经济实惠都欣赏。香菇菜包豆沙包，小笼馒头肉馒头。六宜楼去买紧酵，油里一氽当心咬。茶叶蛋、焐熟藕，大小馄饨加汤包。高脚馒头搭姜饼，价钿便宜肚皮饱。芝麻糊、糖芋艿，油氽散子白糖饺。鸡鸭血汤豆腐花，春卷烧卖八宝饭。糯米粢饭有夹心，各色浇头自己挑。锅贴水饺香喷喷，桂花藕彩海棠糕。臭豆腐干粢饭团，萝卜丝饼三角包。蜜糕方糕条头糕，猪油年糕糖年糕。汤团麻团粢毛团，双酿团子南瓜团。酒酿圆子甜酒酿，定胜糕来梅花糕。
赞赏
